იუნკრები: 1921წ.

ამ ღვთივკურთხეულ დღეს 117 წელი ელოდნენ ქართველები. როგორც იქნა გამოცხადდა ნანატრი დამოუკიდებლობა 1918წლის 26 მაისს.

საქართველოს დროშა და ჰიმნი 1918-1921წ.წ.

დაიწყო აღმშენებლობითი შრომა და ბრძოლა, მაგრამ იმ მსოფლიოურ ქარტეხილებში დიდხანს არ გაგრძელებულა ეს სიხარული. დამოუკიდებელმა ქვეყანამ მხოლოდ 2 წელი და 9 თვე იარსება.
1921წ. 12 თებერვალს საბჭოთა რუსეთი ომის გამოუცხადებლად თავს დაესხა საქართველოს დემოკრატიულ რესპუბლიკას. ამ აქტით საბჭოთა მთავრობამ ყოველგვარი კანონიერი საფუძვლის გარეშე დაარღვია 1920წ. 7 მაისის ხელშეკრულება, რომლითაც აღიარა საქართველოს რესპუბლიკის სუვერენიტეტი.

ენერგიულად ამოქმედდა თურქეთიც, რათა ხელი მოეთბო საქართველოს ისტორიული მიწა-წყლით.
საქართველოს რესპუბლიკის ტერიტორიაზე გაჩაღდა უთანასწორო ბრძოლები. მათ შორის, ვინც თავი ისახელა ამ ბრძოლებში, იყვნენ თბილისის იუნკერთა სკოლის აღზრდილები, რომლებმაც განსაკუთრებული გმირობა გამოიჩინეს კოჯორ-ტაბახმელასთან გამართულ სისხლისმღვრელ ბრძოლებში.